წლების განმავლობაში ონის მუნიციპალიტეტში მცხოვრები ბავშვები სკოლამდელი განათლების მიღმა რჩებოდნენ, რაც მათ განვითარებასა და სწავლის პროცესზე მნიშვნელოვან გავლენას ახდენდა. სოფლებში მცხოვრები ოჯახები მუდმივად დგებოდნენ რთული არჩევანის წინაშე — დაეტოვებინათ მშობლიური ადგილები, რომ თავიანთ შვილებს განათლება უზრუნველეყოთ, ან დარჩენილიყვნენ გარემოში, სადაც ბავშვებს სწავლისა და სოციალური უნარების განვითარებისთვის ელემენტარული პირობებიც არ გააჩნდათ. მიუხედავად მუნიციპალიტეტის მცდელობისა, წლების განმავლობაში რესურსებისა და საკანონმდებლო მხარდაჭერის ნაკლებობა პრობლემის გადაჭრის საშუალებას არ იძლეოდა. სტანდარტული საბავშვო ბაღების მშენებლობა სოფლად არახარჯთეფექტური აღმოჩნდა, რადგან ბავშვთა რაოდენობა თითოეულ დასახლებაში ძალიან მცირე იყო. არსებული კანონმდებლობა კი არ ითვალისწინებდა ალტერნატიული განათლების ცენტრების შექმნის შესაძლებლობას, რაც კიდევ უფრო ზღუდავდა გამოსავლის პოვნას. შედეგად, მუნიციპალიტეტი განათლების სფეროში მუდმივი უთანასწორობის მომსწრე იყო, რაც სოფლებში მცხოვრებ ბავშვებს მნიშვნელოვნად აშორებდა თანატოლებისგან განვითარების ყველა ეტაპზე. აღნიშნული გამოწვევების ფონზე, მუნიციპალიტეტმა გააცნობიერა, რომ საჭირო იყო ინოვაციური მიდგომების დანერგვა, რომლებიც არსებული რესურსების ფარგლებში უზრუნველყოფდა თითოეული ბავშვის განათლების უფლების რეალიზებას.

ონის მუნიციპალიტეტმა არსებული გამოწვევების საპასუხოდ ინოვაციური და პრაქტიკული გადაწყვეტილებები შეიმუშავა, რომლებიც მუნიციპალიტეტის უნიკალურ საჭიროებებზე არის მორგებული. იმისთვის, რომ სკოლამდელი განათლების ხელმისაწვდომობა თითოეულ სოფელში იყოს უზრუნველყოფილი, შეიქმნა სკოლამდელი აღზრდისა და განათლების ალტერნატიული ცენტრები, რომლებიც მცირე რაოდენობის ბავშვებისთვისაც კი სრულად ეფექტური და მდგრადი აღმოჩნდა. მიმდინარე ეტაპზე, მუნიციპალიტეტში ფუნქციონირებს 7 სკოლამდელი აღზრდისა და განათლების ალტერნატიული ცენტრი, რომელთაგან 3 სკოლის ბაზაზეა, ხოლო 4 ოჯახზე დაფუძნებული. ცენტრების საშუალებით, სკოლამდელ განათლებაზე წვდომა მიიღო 14-მა ბავშვმა, რომლებიც სოფლად ცხოვრობენ და რომლებსაც ადრე ამ სერვისზე ხელი არ მიუწვდებოდათ. მნიშვნელოვანი მიღწევაა, რომ ალტერნატიული ცენტრების ხარჯთეფექტურობა მუნიციპალიტეტისთვის ფინანსურ მდგრადობას უზრუნველყოფს. ამ პრაქტიკის შედეგად, ონის მუნიციპალიტეტში მცხოვრები არცერთი 2-დან 6 წლამდე ასაკის ბავშვი აღარ არის განათლების მიღმა დარჩენილი.

 » 2024 – 2025 სასწავლო წელს პირველ კლასში შევიდა ონის მუნიციპალიტეტის სკოლამდელი აღზრდისა და განათლების 4 ალტერნატიული ცენტრის აღზრდილი (2 სკოლაზე და 2 ოჯახზე დაფუძნებული სკოლამდელი აღზრდისა და განათლების ცენტრიდან) სოფლები:  ჭიორა, უწერა, წედისი და ჟაშქვა. როგორც ალტერნატიული ცენტრების აღმზრდელთა და შესაბამისი ზოგადსაგანმანათლებლო სკოლების პირველი კლასის პედაგოგთა ურთიერთთანამშრომლობიდან ირკვევა, ბავშვები, რომლებმაც სკოლისათვის მოსამზადებელი პროგრამა გაიარეს, წარმატებით აგრძელებენ სწავლას პირველ კლასში.